Leiga

Úthlutun hlýtur sá sem er með lægsta númer á biðlista og sem uppfyllir öll allmenn skilyrði fyrir úthlutun að teknu tilliti til forgangs, sbr. gr. 4 í úthlutunarreglum Bjargs.

Skráningum á biðlista er raðað upp í þeirri röð sem þær berast og virkjast þegar greiðsla félagsgjalds hefur verið innt af hendi. Undantekning á uppröðun var þó í upphafi þannig að skráningar til og með 31. júlí 2018 fóru í pott og var umsækjendum raðað í númeraröð með útdrætti. Við úthlutun ræður lægsta númer á biðlista að teknu tilliti til forgangs, sbr. gr. 4 í úthlutunarreglum Bjargs. 

Skilyrði fyrir úthlutun á leiguíbúð Bjargs íbúðafélags:

Úthlutun geta þeir einir hlotið sem hafa verið virkir á vinnumarkaði og fullgildir félagsmenn aðildarfélaga ASÍ eða BSRB í a.m.k. 16 mánuði, litið til sl. 24 mánuði við úthlutun. Fullgildir félagsmenn sem eru tímabundið frá vinnu, í allt að 12 mánuði, vegna fæðingarorlofs eða veikinda halda réttindum sínum. Námsmenn, sem jafnframt eru virkir á vinnumarkaði en sem eiga sjálfstæðan rétt til þess að sækja um íbúðir í húsnæðisfélögum námsmanna eftir þeim reglum sem þar gilda, eiga ekki jafnframt rétt hjá Bjargi meðan á námi stendur sbr. þó gr. 4.10.

Úthlutun geta þeir einir hlotið sem eru undir ákveðnum tekju- og eignamörkum við upphaf leigu, skilgreindum skv. lögum nr. 52/2016 um almennar íbúðir og Reglugerð um stofnframlög ríkis og sveitarfélaga, húsnæðissjálfseignarstofnanir og almennar íbúðir. Til að hægt sé að gera ráð fyrir sambúðaraðila í umsókn þurfa aðilar að vera giftir eða í skráðri sambúð.

Í lögunum eru skilgreind tekju-og eignamörk ásamt viðmiði um greiðslubyrði leigu, í dag eru þau eftirfarandi:
8.686.000 kr. ári, fyrir skatta (eða 723.833 kr. á mánuði) fyrir hvern einstakling.
12.161.000 kr. á ári, fyrir skatta (eða 1.013.417 kr. á mánuði) fyrir hjón og sambúðarfólk.
2.172.000 kr. á ári, fyrir skatta (eða 181.000 kr. á mánuði) fyrir hvert barn eða ungmenni að 20 ára aldri sem býr á heimilinu.

Heildareign heimilis má ekki vera hærri en 9.386.000 kr.

Greiðslubyrði leigu skal að jafnaði ekki vera umfram 25%-30% af heildartekjum leigutaka að teknu tilliti til húsnæðisbóta, barnabóta og meðlags.

Umsækjendur skulu vera orðnir 18 ára við skráningu á biðlista.

Til að geta sótt um íbúð þarf umsækjandi að vera með staðfesta skráningu á biðlista hjá Bjargi.

Að jafnaði er 80% íbúða úthlutað til félagsmanna ASÍ og 20% til félagsmanna BSRB.

Umsækjendur bera ábyrgð á að þeir uppfylli öll almenn skilyrði fyrir úthlutun skv. 1. gr. Umsækjendur bera einnig ábyrgð á því að veita og skrá réttar og fullnægjandi upplýsingar. Bjarg leitar ekki staðfestingar á atriðum eins og tekju- eða eignamörkum, stéttarfélagsaðild eða skráningu í Þjóðskrá fyrr en við úthlutun. 

Skráning á biðlista ein og sér nægir ekki til að fá úthlutað íbúð, heldur þarf umsækjandi að sækja um ákveðna íbúðartegund þegar félagið auglýsir íbúðir lausar til umsóknar. Í hvert sinn sem íbúðir eru lausar til umsóknar sendir Bjarg póst á alla á biðlista með nánari upplýsingum. Ef áhugi er á tiltekinni staðsetningu þarf umsækjandi að senda inn umsókn.